Bölmə:Təhsil Nazirliyi 1724 dəfə oxunub
Təhsil Nazirliyi bəzi şəhər və rayonlarda fəaliyyət göstərən müəllimlərin diaqnostik qiymətləndirməyə buraxılmaması məsələsinə aydınlıq gətirib.
Təhsil Nazirliyinin İnsan resursları şöbəsinin müdir əvəzi Eşqi Bağırov APA-ya açıqlamasında bildirib ki, müəllimlərin işə qəbulu yalnız müsabiqə yolu ilə həyata keçirilir. Onun sözlərinə görə, Təhsil Nazirliyi müsabiqədən kənar işə qəbul halları ilə mübarizə aparır və belə hallar aşkar olunduqda nazirlik tərəfindən tədbirlər həyata keçirilir: “Bunlara həmin müəllimlərin diaqnostik qiymətləndirməyə buraxılmaması, bu işdə səlahiyyətli şəxslərin cəzalandırılması daxildir”.
Nazirlik rəsmisi qeyd edib ki, müsabiqədənkənar işə qəbul olunan şəxslər yenidən müəllim kimi fəaliyyət göstərmək istəyirlərsə, işə qəbul üzrə müsabiqədə (imtahan və müsahibə) iştirak etməlidirlər.
Qeyd edək ki, hər il yüzlərlə müəllim 5-7 min manat pul qarşılığında müsabiqədənkənar işə qəbul olunur. Həmin müəllimlərlə əmək müqaviləsi bağlanaraq nazirlik tərəfindən aylıq maaş ödənilir.
Maraqlıdır ki, indiyə qədər bir çox müsabiqədənkənar işə qəbul edilən müəllimlər Təhsil Nazirliyi tərəfindən diaqnostik qiymətləndirməyə buraxılıb.