Bölmə:Xəbərlər 1567 dəfə oxunub
Bakı Dövlət Universiteti və ya qısaca BDU Azərbaycanın ilk və ən böyük universitetidir. 1919-cu ildə yaradılmış bu böyük təhsil ocağı artıq bir əsrə yaxındır ki, müxtəlif sahələrdə peşəkarlar hazırlayır. Əlbəttə, bu qədər uzun illər ərzində fərqli koloritlərdə minlərlə məzuna məskən olan təhsil ocağının da hər universitetdə olduğu kimi öz nostalgiyası və yaddaqalan özəllikləri var. Bunlar elə şeylərdir ki, hər bir tələbə və məzun üçün xüsusidir və yalnız bu universitetdə oxuyanların başa düşəcəyi şeylərdir.
Sadəcə BDU tələbələrinin anlayacağı 8 məqamı təqdim edirik:
Giriş və mühafizəçilər
Universitetdə baş verən hər şeydən xəbəri olan insanlar: hər gün gördüyümüz, universitetə girəndə də ilk salamladığımız mühafizəçilər. Tələbə biletini unutduqda içəri girə bilmək üçün bu insanlarla aranızdakı münasibəti isti saxlamağa çalışmalıydınız. Əks halda, heç bir şansınız yoxdur.
Pepsi kafesi
BDU-da oxuyanların ən çox üz tutduğu kafe. Bu universitetdə oxuyub da, orada oturmayan tələbə çox az tapılar, xüsusilə də oğlan tələbələr arasında. Tələbələrin bu sevimli məkanında bir stəkan çayın qiyməti 10 qəpik, bütün çaydan isə 20 qəpik olması faktı onu bu qədər aktual edib. Hə, bir də əlbəttə ki, 60 qəpiklik hamburger və kiçik pizzaları olan məşhur Pepsi kafe!
Böyük Bufet
Çox təmtəraqlı görünən bu böyük bufet şadlıq saraylarının interyerini xatırladır. Digər Universitetlərdəki bufetlərdən çox fərqləndiyini deməyə ehtiyac yoxdur. Şəklə baxmaq kifayətdir ki, hər şeyi başa düşəsiniz.
Müşfiqin dönəri
BDU ətrafında tələbələrin ən çox getdiyi, 90-cı illərdən günümüzə qədər müştəriləri tələbələr olan Müşfiqin dönəri haqqında hər zaman əfsanələr gəzir. Hətta deyirlər ki, Xanımlar, cənablar, Müşfiqin dönərindən daha dadlı dönər yediyinizi zənn edirsizsə, ya heç dönər yeməmisiz, ya da ki sizin dadbilmə orqanlarınız yaxşı işləmir. Onunla yarışan “Limuzin” və “Böyükfırat”ı da unutmaq olmaz.
Kiosk
Hər tələbənin yolunun düşdüyü kiçik “butka”. Əsas məqsədi qazet satmaq olsa da, daha çox telefon üçün “kontur” və siqaret almaq üçün istifadə edilən köhnə kiosk bu universitetin tələbələri üçün doğma yerdir.
Siqaret tüstüsü
Tənəffüslərdə dəhlizləri basan siqaret qoxusu və tüstüsü illərdir binanın divarlarına çökür. Tüstü və qoxu müxtəlif istiqamətlərdən gəldiyinə görə, izinə düşüb mənbəni müəyyən etmək də çox müşkül məsələyə çevrilib.
Rektor və Müəllimlər
Son parlament seçkilərində deputatlıq əvəzinə rektorluğu seçməsi ilə təhsil mərkəzinə olan bağlılığını göstərən Abel müəllimin universitet dəhlizlərində gəzdiyi anlar həyəcan və xaosun pik dəqiqələri olur. BDU tələbəsi olub da, o təlaşı yaşamayan insan yoxdur. Müəllimlərlə lift qarşısında üzləşməyin də başqa həyəcanı var idi. Adətən lift onlar üçün işləyirdi, siz isə zəhmət çəkin pillələrlə qalxın.
Əfv və Apelyasiya
İmtahanların stresindən isə danışmağa dəyməz. Nəticənizin apelyasiyaya getmək ehtimal var ki, BDU’da apelyasiya qarşısına çıxmaq öz-özlüyündə ciddi hadisə idi. 1-2 bal fərqi ilə kəsilənləri müəllimlər avtomatik əfv etsə də, daha çoxunu rektor Abel müəllimin rəhbərliyində Apelyasiya komissiyası qərar verirdi. Bu stressə keçirənlərdə qalıcı travmalar da meydana gələ bilər.
SİZ DƏ ÖZ UNİVERSİTETİNZLƏ BAĞLI SİYAHI HAZIRLAYIB GÖNDƏRİN, DƏRC EDƏK!
pahoo.az